Jesu ke mang?

Etela tikologo ye nngwe le ye nngwe mo lefaseng lehono. Bolela le badumedi ba mohuta ofe kapa ofe. Le ge ba ka be ba inneetše bjang mo bodumeding bja bona, ge ba tseba histori le gannyane, ba swanetše go dumela gore ga se nke gwa ba le monna wa go swana le Jesu wa Natsarethea. Ke yena moswananoši wa nako tšohle.

Jesu o fetotše tebanyo ya histori. Ebile le tšatšikgwedi mo kuranteng ya lehono e hlatsa taba ya go re Jesu wa Natsarethea o ile a phela mo lefaseng nywaga ye 2,000 ye e fetilego. B.C. e emetše “before Christ”, ke go re “pele ga matswalo a Jesu”; A.D. e emetše “Anno Domini”, ke go re “ngwaga wa Morena”.

GO TLA GA GAGWE GO LAOLETŠWE PELE

Makgolokgolo a nywaga pele ga matswalo a Jesu, Bibele e bega mantšu a baprofeta ba Isiraele ba ba laoletšego pele go tla ga gagwe. Testamente ye Tala yeo e ngwadilwego ke batho ba ba fapafapanego mo sebakeng se e ka bago nywaga ye 1,500, e na le dipego tše di fetago 300 tše di begago go tla ga Jesu. Tšohle dipego tše di ile tša netefala, gotee le pelego ya gagwe ye e makatšago, bophelo bja gagwe bja go hloka sebe, dimakatšo tše dintši tše a di dirilego, lehu la gagwe, le go tsoga ga gagwe lehung.

Bophelo bja Jesu, dimakatšo tše a di dirilego, mantšu a a a boletšego, lehu la gagwe sefapanong, go tsoga ga gagwe lehung, thotošetšo ya gagwe legodimong — tšohle di bontšha gore e be e le monna yoo seemo sa gagwe se bego se feta maemo a monna wa ka mehla. Jesu o boletše a re “Nna le Tate re batee” (Johane 10:30), “E a bonego nna o bone Tate” (Johane 14:9), le “Tsela ke nna, le therešo, le bophelo. Ga go e a tlago go Tate ge e se ka nna.” (Johane 14:6).

BOPHELO LE MOLAETŠA WA GAGWE DI HLOLA PHETOGO

Šetša bophelo le seriti sa Jesu wa Natsaretha, yena Kriste, mo historing, gomme o tla lemoga gore o hlola diphethogo tše kgolo mo maphelong a batho le ditšhaba ka molaetša wa gagwe. Mo gohle mo dithuto tša gagwe di ilego tša kwagala, bokgethwa bja lenyalo le ditokelo tša basadi di ile tša hlompšha; dikolo le diyunibesithi di ile tša hlongwa, melao ye e šireletšago bana e ile ya thewa; bokgoba bo ile bja fedišwa, ešita le diphethogo tše dingwe tše dintši tše di bego di hola batho di ile tša hlagišwa. Le maphelo a batho a ile a fetolwa. Go swana le Lew Wallace, setsebi sa go tuma sa dingwalwa, yo e bego e le moilamodimo. Mna Wallace o tšere nywaga ye mebedi a ithuta makgobapukung a Europa le Amerika a tsoma bohlatse bjo bo ka mo kgontšhago go fediša Bokriste mo lefaseng. Mola a sa swaragane le karolo ya bobedi ya puku yeo a bego a e ngwala, a ikhwetša a khuname ka matolo a rapela Jesu a re “Mong le Modimo wa ka.”

Ka baka la bohlatse bjo bo tiilego, o be a se sa kgona go ganetša taba go re Jesu ke morwa wa Modimo. Ka morago, Lew Wallace o ngwadile puku ya Ben Hur, gomme ya ba padi ye bohlokwahlokwa ya Seisimane ye e laodišago bophelo bja Jesu.

Go swana le mohu C. S. Lewis, moprofesa wa Yunibesithi ya Oxford kua Engelane, yoo le yena e bego e le moilamodimo. O be a ganetša bodimo bja Jesu mengwaga ye mentši. Eupša, ge a tšama a tsinkela dingwalwa go ikgonthišetša bonnete bja Kriste, a sokologa gomme a inneela Jesu a mo tšea bjalo ka Mophološi le Modimo wa gagwe.

MONG, MOAKETŠI GOBA SEGAFI?

Mo pukung ya gagwe ye e tumilego “Mere Christianity”, Lewis o re, “Ge monna wa ka mehla a ka be a bolelše tše di boletšwego ke Jesu, monna yoo e be e ka se ke ya ba e le morutaboitshwaro yo mogolo. E tla be e le segafi — go swana le monna yo a iponago e le lee le le apeilwego — goba e tla be e le Sathane yo a tšwago heleng. Wena o swanetše go kgetha mo. Ka hlakoreng le lengwe, monna yo e be e le Morwa Modimo, ebile le bjale go sa le bjalo; goba, ka hlakoreng le lengwe, e be e le segafi goba se sengwe go feta moo. O ka mo homotša ka go mo tšea bjalo ka setlaela, goba o ka khunama maotong a gagwe wa mmitša Mong le Modimo. Eupša, a re se boleleng ditšiebadimo ra mo hlaloša ka go re e be e no ba e le morutiši yo mogolo wa batho. Ga a ka a re fa sebaka sa go mo tšea ka tsela yeo.”

Naa Jesu wa Natsaretha ke mang go wena? Karabo ya gago e ama bophelo bja gago bja mo lefaseng le, ešita le bophelo bja gago bja go se fele.

Ditumelo tšohle tše dingwe di hlotšwe ke batho, gomme di theilwe godimo ga dikakanyo tša batho le melao ya boitshwaro. Ge bahlodi ba ditumelo tše ba ka tlošwa mo go tšona, go ka se fetoge selo. Eupša, ge re ka tloša Jesu Bokristeng, go ka se šale selo. Bokriste bja Bibele ga e no ba thutabophelo goba tlhompho ya melao ya boitshwaro le thapelo. Bokriste bja nnete bo theilwe godimo ga setswalle sa nnete gare ga motho le Mophološi le Mong yo a tsogilego bahung.

MOTHEI YO A TSOGILE BAHUNG

Jesu wa Natsaretha o ile a baboplwa sefapanong, a bolokwa mo lebitleng le le adimilwego, gomme morago ga matšatši a mararo a tsoga bahung. Ga go bodumedi bjo bongwe bjo bo swanago le Bokriste mo tabeng ye. Pego efe kapa efe ye e kgonthišago bonnete bja Bokriste e thekgwa ke bohlatse bja go tsoga bahung ga Jesu wa Natsaretha.

Mo mengwagakgolong ye e fetilego, bontši bja dirutegi bjo bo nyakišitšego bohlatse malebana le go tsoga ga Jesu bahung, bo holofetše gore Jesu o a phela. Le lehono go sa le ka tsela yeo. Mohu Simon Greenleaf, setsebi sa thutamelao sa Yunibesithi ya Harvard, o nyakišitše bohlatse bjoo bangwadi ba Ebangedi ba bego ba na le bjona mabapi le go tsoga ga Jesu, gomme ka morago a re: “Ga go ka moo ba ka bego ba kgona go hlatsela seo ba se boletšego ge ba be ba se na tsebo ye e feleletšego ya go re ka kgonthe Jesu o tsogile bahung.”

John Singleton Copley, ramolao yo a tumilego kudukudu kua Engelane, o boletše a re: “Ke tseba gabotse gore bohlatse ke eng, gomme ke a le botša gore bohlatse bjo bo kgonthišago go tsoga ga Jesu bahung ga se nke bja ba bja tekateka la gatee.”

MABAKA A TUMELO

Go tsoga ga Jesu bahung ke kokwane ye e thekgilego kholofelo ya Mokriste. Go ka fiwa mabaka a mantši a a dirago gore batho ba ba ithutago ka go tsoga ga Jesu, ba dumele nnete ya taba ye:

GO BOLETŠWE GO SA LE KGALE: Sa pele, Jesu ka boyena o boletše pele ga nako gore lehu la gagwe le go tsoga ga gagwe go tlo phethagala bjang, gomme, ka kgonthe, ditaba tše tša phethagala ka wona mokgwa woo
(Luka 18:31—33).

LEBITLA LA GO HLOKA SELO: Sa bobedi, re ka se kgone go hlaloša lebitla le le feleletšego le se na selo, ge e se ka tsela ya go tsoga ga gagwe bahung. Ge re bala Bibele ka šedi, re lemoga gore lebitla leo ba mo fihletšego go lona, le be le letilwe ke masole a Baroma, ebile le be le thibilwe ka leswika le legologolo. Ba bangwe ba akanya gore Jesu o be a no ba a idibetše ge ba mo tsenya moo a sa hlokofala. Eupša, ge go ka be go le bjalo, masole a be a tlilo mo thibela ge a re o a tšwa, ešita le leswika leo le bego le thibile mojako. Ebile le balatedi ba gagwe ba be ba ka se kgone go mo ntšha ka moo. Manaba a Jesu ona a be a ka se ke a ba a nagana go utswa setopo sa gagwe la gatee, gobane a tsebile gore ge a ka dira bjalo, a tlo tiiša kholofelo ya batho ya go re ka nnete o tsogile bahung.

KGAHLANO LE BATHO: Sa boraro, ka morago ga poloko ya Jesu, o ile a bonwa ke barutiwa ba gagwe. Ga go ka fao re ka hlalošago ponagatšo ye ge re sa holofele nnete ya go re o tsogile bahung. Ge a se na go tsoga bahung, o ile a iponagatša galesome go bao ba bego ba mo tseba. Ka nako ye nngwe o be a bonwa ke batho ba 500. Batho ba ba mmonego ba be ba sa lore: O boletše le bona, a ngwatha dijo le bona, ba bile ba mo kgwatha ( I Johane 1:1).

GO HLOLWA GA KEREKE: Sa bone, semaka se sa go tsoga ga Jesu bahung ke sona se se hlalošago go hlolwa ga kereke ya Kriste. Ga go mokgatlo wo mongwe mo lefaseng wo o fetago kereke ya Kriste. Seripagare sa pele sa thero ya mathomothomo (Ditiro tša Baapostola 2:14-36). se amana le go tsoga ga Jesu bahung. Kereke ya mathomo e ile ya lemoga gore semaka se, e be e le wona motheo wa molaetša wa kereke. Ge go be go kgonagala, manaba a Jesu a ka be a thibetše tlholo ya kereke ka go no tšweletša setopo sa gagwe.

MAPHELO A A FETOGILEGO: Sa bohlano, ga go se sengwe se se ka hlalošago diphetogo tše di hlotšwego mo maphelong a barutiwa ba Jesu, ge e se go tsoga ga gagwe bahung. Barutiwa ba gagwe ba mo lahlile pele ga go tsoga ga gagwe; ka morago ga lehu la gagwe ba be ba nyamile ba tšhogile. Ba be ba sa holofele gore o tla tsoga bahung
(Luka 24:1-11).

Eupša, le ge banna le basadi ba ba be ba nyamile ba swabile, morago ga go tsoga ga Jesu lehung le ka Pentekose, ba ile ba fetolwa gomme ba kgothatšwa ke maatla a Jesu yo a tsogilego. Ba fetoše lefase ka leina la gagwe. Ba bantši ba ile ba bolawa ka baka la bodumedi bja bona, mola ba bangwe ba ile ba hlomarelwa gašoro. Se se hlalošago bonatla le kgotlelelo ya bona, ke ge ba be ba na le nnete ye e feleletšego ya go re Jesu o tsogile bahung. Ke sona se se dirilego gore ba inneele, le ge ba be ba ka hlagelwa ke lehu.

Ke nywaga ye 40 ke šoma le dirutegi tša diyunibesithi tša lefase, gomme ga se nke ka gahlana le o tee yo a nyakišitšego bohlatse bja go tsoga ga Jesu bahung, yo a sa dumelego gore ke yena Morwa Modimo, Mophološi yoo Mangwalomakgethwa a re tshepišitšego yena. Le ge go na le ba ba sa dumelego, ge ba botšišwa go hwetšwa ba re: “Ga ke ešo ka ipha nako ya go bala Bibele le go innaganela ditaba tše di amanago histori ya Jesu.”

MONG YO A PHELAGO: Ka ge Jesu a tsogile bahung, balatedi ba gagwe ga ba no dumela melao ya boitshwaro yeo mohu a ba tlogeletšego yona. Aowa, ba laetša mafolofolo mo setswalleng sa bona le Mong yo a phelago. Le lehono, Jesu Kriste o a phela gomme o šegofatša le go nontšha maphelo a batho bohle bao ba mo tshepilego le go mo theetša. Mo mengwagakgolong ye e fetilego, batho ba diketekete, bao ba bangwe ba bona e bego e le baetapele ba ba tumilego, ba dumetše bohlokwa bja Jesu Kriste.

Serutegi se segolo sa fisika kua Fora, Blaise Pascal, o boletše ka bohlokwa bja Jesu go motho a re, “Modimo o file motho yo mongwe le yo mongwe kganyogo mo pelong yeo e sa kgonego go kgotsofatšwa ge e se ka Morwa wa gagwe, Jesu Kriste.”

Na o nyaka go tseba Jesu bjalo ka Mophološi wa gago yo a phelago? O a kgona! Jesu o kganyoga go thomiša setswalle sa lerato le wena, ebile o šetše a beakantšhitše mabaka ohle go go kgontšha go thomiša setswalle se.

Go kwa gore o ka thomiša bjang setswalle le Jesu yo a phelago, tobeletša mo......